WOW HD NL
Alle producten
  • Alle producten
  • Upc/Cat
  • Movies/TV
  • Acteur
  • Studio
  • Titel
  • Music
  • Album
  • Kunstenaar
  • Artiest (alleen Lp)
  • Label
  • Song
  • Classical
  • Album
  • Persoon
  • Werk
  • Video Games
  • Studio
  • Titel
GRATIS verzending op alles!

Verkennen

In Stock

Genre

Formaat

Kunstenaars

Acteurs

Specialiteit

Gewaardeerd

Label

Decades

Verkennen

In Stock

Genre

Formaat

Kunstenaars

Acteurs

Specialiteit

Gewaardeerd

Studio

Decades

Kleur

Verkennen

In Stock

Genre

Formaat

Kunstenaars

Acteurs

Specialiteit

Gewaardeerd

Label

Decades

Felicidad

Felicidad

  • Door Grupo Di Betico
  • Release 13-12-2011
  • Muziekgenre International
  • Media-indeling CD
Share Twitter
CD 
Prijs: € 13,45

Product notities

GRUPO DI BETICO ta un agrupacion familiar cu raiznan musical y cultural profundamente Arubano. E herencia musical di famia Croes ta uno cu a wordo pasa di generacion pa generacion. Desde comienzo di siglo 20, den e hogar di famianan Croes na Santa Cruz, musica tabata un forma di expresion y entretenimiento. Na cas di Francisco 'Panchico' Croes y Maria Luisa 'Mimita' Croes Lopez, for di chiquito e yiunan por a aprecia y admira e dushi musica tipico Arubano cu tabata ser treci pa familiarnan musico manera entre otro Mo Tito y su Conhunto Folclorico Arubano. Den cas semper tabata reina e ambiente musical y por lo tanto cada un di e yiunan di Don Pancho y Mimita a lanta ta canta of toca un of otro instrumento musical. Na aña 1959 momento cu nan yiu Betico a regresa Aruba despues di a termina su estudionan na Hulanda, el'a motiva su rumannan pa rebiba y continua cu e tradicional paranda familiar di fin di aña. Despues di misa di Pasco mainta su paranda tabata pasa di famia pa famia. Betico tocando su sonfonia di man (acordeon) mientras cu e otro rumannan tabata canta of toca un instrumento. E famia den su totalidad tabata participa na e parandanan di tur fin di aña, principalmente e Dande di tur aña nobo, bishitando famia y amigonan cu e alegre saludo musical. Na aña 1968, na yegada di e rumannan Rudy y despues Tommy cu tabata studia na Hulanda, a dicidi di formalisa e grupo formando asina e agrupacion tipico parandero cu despues a wordo bon conoci como Betico Y Su Grupo. E grupo tabata forma pa rumannan Betico, Rudy, Aiky, Tommy, Efrain, Hendrik y Adison, mientras cu e rumannan muher Ada, Chichia, Mary, Didi hunto cu nan famia, tanta, omonan y demas famia, tur tabata participa cantando of tocando un instrumento. Betico tabata percura pa e paranda di Dande tur aña pasa den cada skina di nos isla bishitando famia, amigo y conocirnan. Betico Y Su Grupo a participa na tur festival di Dande desde su inicio den e decada di añanan 70, cu excepcion di algun biaha cu pa motibo di luto e grupo no por tabata presente. Betico tabata tin un amor grandi pa e folclore y cultura di su isla y tabata entrega tur su esfuerso pa promove e musica tipico Arubano. Mientrastanto, entre e subrinonan tabata tin un chiquitin inquieto cu a hereda e talento musical familiar aki y tabata mustra hopi interes den musica. Hildward, yiu di Ada y Maiky, tabata toca sonfonia di man banda di su omo Betico den e grupo. Esaki a resulta den un influencia musical grandi p'e y asina a bira e prome di e famia cu a tuma e paso di continua su estudio avansa den e ramo di musica profesional. Na aña 1986, despues di e fayecimento di Betico, e grupo a dicidi di continua cu e tradicion familiar aki na su honor. Betico na mas cu un ocasion a expresa e deseo ferviente di mira nos folclore y cultura sigui florece y cu generacionnan di futuro por keda apreci'e y conserv'e. Na e momento ey e grupo a tuma e decision di cambia e nomber pa Grupo Di Betico. Na aña 1990, Hildward a compone e cancion Paranda Arubiano pa e grupo por a participa cu n'e den e festival di Dande como propio composicion. Asina na aña 1991 e grupo a gana e premio di mihor composicion original den e festival anual di Dande y musica tipico. E siguiente aña Grupo Di Betico a cuminsa graba su propio composicionnan y e canticanan tabata resona exitosamente na radio emisoranan. Aki e estilo y zonido original di e grupo a keda formalmente concretisa. Un estilo parandero navideño alegre, caracterisa pa e instrumentonan tipico-acustico y e coro di voznan baronil. E publico inmediatamente a abrasa e estilo unico y e musica contagioso di e grupo y pedida pa presentacionnan publico y fiestanan priva a cuminsa drenta na gran escala. Sinembargo e meta original pa cual e grupo a wordo funda, esta e tradicion di bishita famia cu e saludo musical di fin di aña, nunca a wordo lubida of laga un banda. E grupo semper a percura pa mantene e tradicion familiar aki bibo. Ariba multiple peticion di su fanaticonan, Grupo Di Betico a realiza nan prome disco compacto titula "Paranda Arubiano" na aña 1995. E exito di e prome produccion aki tabata abromador y e cantidad di venta a surpasa 10.000 ehemplar. Canticanan manera Paranda Arubiano, Ban Celebr'e Y Festeh'e, Añ' Nobe Awe, y Arubianonan, instantaneamente a bira clasiconan navideño. E grupo a ricibi na diferente ocasion galardonnan pa mihor grupo tipico di fin di aña. E principal cantante di Dande di e grupo, Sr. Maiky Croes, kende a hereda su estilo di Dande original for di su tata Joonchi, cu ta e prome persona cu a graba un Dande cu su ruman Mo Tito y su Conhunto Folclorico Arubano, a pasa e herencia aki na su yiu Maikito cu a bira Rey Di Dande cu Grupo Di Betico na aña 1998, 2002 y 2005. Na aña 1999, Grupo Di Betico a lansa su di dos produccion musical ariba disco compacto titula: "Tradicion". Un bes mas e exito di e grupo tabata inmenso. Un Siglo Nobo, Mi Conono, Mosaico Di Aguinaldo, y Mosaico Arubiano ta algun di e clasiconan di e di dos produccion di Grupo Di Betico. Na aña 2002 un bes mas Grupo Di Betico a pone un joya di disco compacto ariba mercado. E produccion aki titula "Alegria" a mantene e mesun formula exitoso di e grupo: e ritmo contagioso, e melodia y harmonia inigualable, e alegria, y e voznan unico di Grupo Di Betico. Canticanan manera Alegria, Dugudushi, y Te Ora Solo Sali, a sa di cosecha e exito grandi cu e grupo a conoce den su trayectoria discografico. Ariba e disco compacto aki tambe ta aparece e Dande canta pa Rey Di Dande di aña 2001 acompaña pa Grupo Di Betico, Sr. Eric Ras. Den representacion di e cultura y folclore Arubano, Grupo Di Betico a realisa viajenan di presentacion na diferente pais rond mundo. Grupo Di Betico a presenta exitosamente ariba escenarionan grandi na Hulanda, Belgica, Alemania, Brazil, Cuba, Republica Dominicana, Curacao, y Bonaire. Aña 2006 Grupo Di Betico a trece e produccion "Libertad!" conmemorando e celebracion di 30 aña di himno y bandera y 20 aña di Status Aparte di Aruba. E produccion aki ta un dedicacion di e grupo na nan inmortal fundador, libertador y tata di pais Aruba: Betico, arquitecto, constructor y realisador di e Status Aparte di Aruba. E disco compacto "Libertad!" ta presenta composicionnan den e diferente ritmo y generonan tipico Arubano. Gos Oduber, bajista di e grupo, ta compositor di mayoria di e canticanan cu ta aparece ariba e produccion aki. Na vispera di nan di 40 aniversario, Grupo Di Betico a lanza e CD "Celebracion" especialmente pa e temporada di fin di aña 2007. E CD aki ta hiba e mesun seyo di ambiente y alegria cu Grupo Di Betico ta conoci p'e y a bira otro exito grandi pa e agrupacion tipico Arubano cu ta cumpliendo 40 aña di existencia. Como parti di e gran celebracion di 40 aña, Grupo Di Betico a realisa un magno concierto na final di aña 2008 na e amphiteatro di Paseo Herencia, y esaki a wordo filma y graba en bibo y lansa ariba mercado como DVD y CD bou titulo di 'E Concierto Di Alegria'. Un anochi sublime cu a captura e calor musical y e ambiente total cu Grupo Di Betico ta conoci p'e. E mas reciente produccion discografico den e colleccion di Grupo Di Betico ta titula 'Felicidad'. Un bes mas e disco compacto aki ta comberti su mes den un clasico. Exitonan manera Bendiciona componi pa Hildward Croes y canta pa e flamante cantante di Corsow residencia na Hulanda Izaline Calister, como tambe Yen Di Emocion y Bonconco ta entre e grandinan di fin di aña na Aruba. E herencia familiar cu a cuminsa na Santa Cruz generacionnan atras den famia Croes ta continua cu pasonan firme, mirando cu ya caba varios di e yiunan hobencito den famia ta cantando y tocando diferente instrumentonan. Grupo Di Betico ta ser considera patrimonio cultural nacional Arubano y esey ta keda comproba mediante e cariño y aprecio cu e pueblo di Aruba semper ta demostra pa e grupo musical procedente di un famia humilde di Santa Cruz.

Details

Kunstenaar: Grupo Di Betico
Titel: Felicidad
Genre: International
Releasedatum: 13-12-2011
Label: CD Baby
Media-indeling: CD
UPC: 700261898520
Dit product is een speciale bestelling

Credits